Os Hubs de Innovación Dixital son o punto de encontro entre a empresa, a investigación e o financiamento ao redor de ámbitos estratéxicos para Galicia: Industria 4.0, Aeronáutica e Bioeconomía. 

A Xunta de Galicia crea estes hubs co fin de dinamizar a innovación e facilitar o achegamento á financiación e á formación: actúan como espazo único de acceso aos servizos de apoio a innovación, integrando as instalacións e servizos que as empresas necesitan para levar a cabo proxectos de I+D+i. Ademais, grazas á creación deste espazo colaborativo, foméntase a creación de vínculos entre empresas a nivel galego, nacional e internacional.

Nos hubs todos se benefician: as empresas provedoras de innovación poden madurar as súas tecnoloxías e ampliar as súas aplicacións, abrindo novos mercados; as pemes obteñen apoio para levar ao mercado novos produtos e servizos competitivos, tendo acceso a novas tecnoloxías que melloran a súa competitividade; e os centros de competencias estenden as súas actividades a proxectos industriais, abrindo modelos de negocio sostibles.

• Dihgigal: nace para promover a transformación dixital dos diferentes sectores industriais de Galicia, buscando a mellora competitiva e a apertura de novos horizontes de negocio. Impulsado conxuntamente polos Clústeres da Automoción, Naval, TIC e Alimentario, facilita o salto cualitativo das pemes cara a súa total dixitalización.
• Datalife: busca aplicar intelixencia artificial e big data nas pemes dos sectores primario, biotecnolóxico e saúde. Nace coa visión de converter a Galicia na Biorrexión de referencia en Europa, mellorando a competitividade das pemes galegas.